منوٙ مانگهشهوه وبلاگ روستای بلبر
منوٙ مانگهشهوه
ئیٛشهو خیاڵا گرتا دامانوٙ نمازا پی زوٙی بلوٙ بوٙسوٙ ماچا چهنی ۉهرمت میٛ شاروٙ غهریبانه چهنی تاڤی بوٙسی ۉهختێ که دڵت خهمینا دابزیهره وهراوهروٙ ئا دهلاقهی مانگهشهوێ ههرمانه پهنهنی واتم ۉێڵم کهره ۉهرمم مێ ۉهرم که نا گاههس زوٙتهر مهنزڵگاۆ دڵیم ڤینو ماچۆ دابزیهره با بهروت پهی مهنزڵگاۆ عێشقی که ۉهختێ زیانێره مانگهشهوه به دڵێ مهلوٙول ماچۆ خاس بێ ۉفانی واتم چێش قۆمیان ئێشهو شۆڵهت کزا پێسه چاوهڵی شهۆقت نیا ماچوٙ دا بۆ با بهروٙت پهی بهههشتهکهیت گۆش گێره زانه چێش ماچوٙ هۆشتا جه شهوهکا هامنینه یا شهۆگاره کۉڵهکا وههارینه ۉه شهۆگاره درێژهکا پاییزوٙ زمسانی نیشێنیرهۆ قسێم چهنی کهرێنی بیێ بێنێ به مهحرهموٙ ڕازهکات وٙ ۉهشهویسیت هۆشتا داموٙ قسهکانه ڕاویارێ ویهرێۆ به سڵامێ یا بهحسێ قسهکا پڕچنێ ههزار ۉهشڵهیم به ئا وهختی یاڎش به خهیرهاژهۆ بنجۆی چه دڵگیروٙ وهش بێ یا کهڵکهڵهوایلهکێ که شهوێنه ۉهنێۆ ئێنسان لوێ فکرێره بهڵام ئیسه بۆڕهۆ ماشینا نمازۆ ۉهشت بۆ دابزیهره با واچوٙت چهنی که من چێش وینوٙ تۆ مهوینی من ئێشهو چۆڵی بڵبهری وینوٙ که کهسش چهنه نیا داروٙ درهختش شهووٙ ڕۆ چهنی بهرزوٙخاسیو قهڵاۆ کتا تاتهڕۆ کهرا پهی چۆڵیش وٙ مهتاوا سهبوٙری ئا یانا بڎاوه که خۆڎا زانۆ تاتهی دامانگ چکۆ نیشته بۆ تهوهنیوه ۆ ئارڎێبۆش پهی ئانهی یانه کهرۆوه پهی زاوڵهکاشو بهڵام نهزانێ زاوڵێ ههریۆشا دهربهدهروٙ شارێن مهتاوا سهبوٙری کهڵۆه چۆڵهکاش بڎاوه ئیسه وینوٙ که ئا جاڎه پانوٙپۆڕه ڕاویارش مهگنۆ چوٙن ڕاویار نهمهنهن مهژنهووٙ قاڵهۆ زاوڵا که واچا تۆ خۆڎا یوهتهره تۆ خۆڎا یوهتهرهۆ جه تاتهی مانیاۆ هیلاکیشا ڕازهشا گهرهکه بۆ ئیسه حهر دهنگوٙgem tvۆpmcمژنهووٙ ئاڎیچ جه شارهکانه نه جه دهگا چۆڵهکانه مهزانی به دڵیم که ۉهختێ شهوه مێرا تاتهڕۆ کهرۆو ماچۆ خۆڎا بهشکیم ههۆر بۆۉ نهلوٙ دیاروٙ دهگا چۆڵهکا بهڵام حهر ملوٙ بێجگهم جه لهمهمانا حیچ تهر زیاڎ مهکهروٙ ئاخ که چن دڵم تهمیانره
واتم درۆسا مهوینوٙ بهڵام دڵم ئینا جه بڵبهرنه ئینا جه چایخانهۆ سێ ٙحهسهنینه ئینا لا ئا شهواوه که چهنی ڕهفێقهکام گنێنمێ ڕا تا تهوهنوٙ سرهوای به قسه کهرڎهیۆ تۆم ۉارڎهی لوێنمێ ئینا جه بانوٙ خۆسرهوی ۆ لا تانگێۆ سهروٙ قهنچی ئینا لا دڵه مهڕیاکهۆ بابایمۆ که جه شۆنوٙ کۆچیماره خۆڎا ۉێش زانۆ چننه گرهوا ئینا لا ئا ڕۆیوه که به گرهوه گرهو بڵبهرم جیا ئاسوٙ تا مهریوان گرهوانێ ئینا لا دڵوٙ ۉاڵهکامۆ که وێرهگا جهسسه زێیٛنێ وهراوهروٙ شاری ۆ باۆشوٙ یۆترینینه دوٙر جه ئێمه گرهوێنێ نهواچی بێ ۉهفانی بهڵام دڵم ئیسهیچ ئینا لا ههنار شارۆ کهرڎهیوه ۆ بهلوٙ برێشتهیوه بازه با سۆچوٙ دهرڎوٙ ۉێمۆ حهرغهریبی ۆ دوٙر جه ۉهڵاتیم وهسێما تویچ مهبه باروٙ سهربارا زامیم مهکۉلنۆ بابلوٙ ساتێ بوٙسوٙ بهشکیم ۉهتهنیم وینوٙ ۉهرمم ههرچننه زانوٙ به گلهێوه میٛ بهڵام حهر خیٛر بیٛ پاڵێش سهروٙ چهماموٙ میا چهماش ماچه کهروٙ چوٙنکه قیبلهگاۆ منا تۆ خۆڎا بازه با ساتێ بوٙسوٙ کهم مهراقێم ده پهنه کهم ئیتر وهسێما خۆڎا حافێزت بۆبهڵام تۆ بی ئا خۆڎا که ئیسه مڎیهیرا بڵبهر حهرجه سهروٙ ملهگای تا ملهگاۆ سلێنێ سڵامیم یاونه تۆبی ئا خۆڎا تۆبی ئا شۆڵهۆ ۉێته
واوهی شهوهت ۉهش واوهی شهوهت ۉهش واوهی شهوهت ۉهش...
واتهی:مهحموٙڎ ئهزهغ
نویسهی:هۆشیار ئهزهغ
هه رچن مه واچا فارسی شکرن/